20 January 2025

İran Azərbaycanının 4 vilayətinin cümə imamları toplantı keçirib

İranın ali rəhbəri Ayətullah Əli Xameneyinin İran Azərbaycanının vilayətlərindəki nümayəndələri Təbrizdə birgə iclas keçirib.

Rəsmi İRNA xəbər agentliyinin məlumatına görə, yanvarın 18-də şənbə günü Şərqi Azərbaycan, Qərbi Azərbaycan, Ərdəbil və Zəncan vilayətlərinin cümə imamları birgə toplantı keçirib və iclasın nəticələri açıqlanıb.

İmişlidəki qəza haqda yazanları polisin təqib etdiyi bildirilir

İmişlidə yüksək sürətlə hərəkət edən yol polisinin iki azyaşlının ölümü ilə nəticələnən törətdiyi qəza və etirazlarla bağlı sosial şəbəkələrdə paylaşım edənlərin polis tərəfindən təqib olunduğu bildirilir.

Azərbaycan Xalq Cəbhəsi Partiyası (AXCP) son iki gündə bir sıra fəallarının saxlanıldığı, onların sosial şəbəkə hesablarına müdaxilə edildiyi və paylaşımlarının silindiyi haqda məlumat yayıb.

“Mançester Siti”dən altı qollu qələbə

İngiltərə Premyer Liqasında 22-ci turun növbəti oyunu keçirilib.

“Mançester Siti” səfərdə “İpsviç”lə qarşılaşıb. Görüş qonaqların 6:0 hesablı qələbəsi ilə yekunlaşıb.

Qolları Fil Foden (2 qol ), Mateo Kovaçiç, Erlinq Holann, Ceremi Doku və Ceyms Mkate vurublar.

Bu nəticədən sonra xallarını 38-ə çatdıran “Mançester Siti” 4-cü pilləyə yüksəlib.

Serbiyada tətil edəcək müəllimləri dəstəkləyən tələbələrin etirazı baş tutub

Serbiyanın paytaxtı Belqradda minlərlə tələbə maaş və iş şəraitinə görə sabah tətil edəcək müəllimlərə dəstək olaraq etiraz aksiyası keçirib. Serbiya Müstəqil Təhsil İşçiləri Həmkarlar İttifaqının üzvləri sabah başlayacaq tədris ilinin ilk günündə müəllimlərin maaşlarından və iş şəraitindən narazı olduqlarını əsas gətirərək ibtidai və orta məktəblərdə dərslərə getməyəcəklərini açıqlayıb.

Minlərlə tələbə müəllimlərə dəstək olmaq üçün toplaşaraq Serbiya Təhsil Nazirliyinin qarşısında nümayiş keçirib.

Ben Qvirdən qalmaqallı çağırış

İsrailin ifrat sağçı milli təhlükəsizlik naziri Itamar Ben Gvir Qəzzada qalan məhbusların "məcburi" azad edilməsinə çağırıb.

Ben Gvir bazar günü üç əsirin azad edilməsi ilə bağlı X-də verdiyi açıqlamada, qalan əsirlərin “təslim olmaq yolu ilə deyil, güc yolu ilə, yanacağın kəsilərək, humanitar yardımı dayandırmaqla” geri qayıtmasını gözlədiyini söyləyib.

Ben Qvir və Yəhudi Güc Partiyasının üzvləri HƏMAS ilə atəşkəs razılaşmasına görə hökumətdən istefa veriblər.