Əmək və Əhalinin Sosial Müdafiəsi Nazirliyi yeni hesabatlar yayıb. Rəsmi məlumata görə, Dövlət Sosial Müdafiə Fondunun sosial xidmət müəssisələri 10784 nəfər tənha ahıl və əlilliyi olan şəxsə evlərində sosial-məişət xidməti göstərir. Onların 78 faizi yaşı 70-i ötən şəxslər, qalanları əlilliyi olan insanlardır.
Əmək qabiliyyətli qohumları və ya qanuni nümayəndələri ilə eyni yaşayış məntəqəsində yaşamayan və sosial xidmətə ehtiyacı olan tənha ahıllara, ahıl ər-arvadlara, əlilliyi olan şəxslərə evdə (səyyar) sosial xidmətin göstərilməsi təmin edilir. Sosial işçilər həftədə azı iki dəfə tənha ahıl və əlil şəxslərin evlərində olur, onlara evdə təmizlik işlərinin aparılması, əsas tələbat mallarının alınması və s. işlərdə köməklik göstərirlər.
Başqa bir hesabata əsasən, 2018-ci ilin yanvar-sentyabr aylarında Əmək və Əhalinin Sosial Müdafiəsi Nazirliyinin "Elektron hökumət” portalında təqdim etdiyi xidmətlərə 7 milyon 797 min 401 müraciət qeydə alınıb. Xidmətlər sırasında ən çox müraciət olunanı "Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” elektron xidmətidir. 9 ayda həmin xidmətə 2 milyon 782 min 963 dəfə müraciət olunub.
"Məcburi dövlət sosial sığortası üzrə hesabatların təqdim edilməsi” (1 milyon 289 min 574 müraciət), "İş yerinə dair arayış” (489 min 712 müraciət), "Tibbi-sosial ekspert komissiyasında sonuncu müayinəyə dair məlumatın verilməsi” (428 min 114 müraciət), "Əmək müqaviləsi bildirişləri barədə məlumatları işçilərin əldə etməsi” (308 min 150 müraciət), "Əmək qabiliyyətinin müvəqqəti itirilməsinə görə müavinətlə bağlı haqq-hesab cədvəlinin təqdim edilməsi” (237 min 940 müraciət) xidmətləri də vətəndaşların daha çox faydalandığı xidmətlər sırasındadır.
Əmək və Əhalinin Sosial Müdafiəsi Nazirliyinin 30-a yaxın elektron xidməti fəaliyyət göstərir.
Əmək və Əhalinin Sosial Müdafiəsi Nazirliyinin yeni hesabatları
Oxşar xəbərlər