Möhyəddin Orucov 3 il azadlıqdan məhrum edilib

25/02/2025 - 20:40
Fevralın 25-də ictimai fəal Möhyəddin Orucov 3 il azadlıqdan məhrum edilib.
Bu barədə qərarı Bakı Ağır Cinayətlər Məhkəməsinin hakimi Rasim Sadıxovun rəhbərlik etdiyi kollegiya çıxarıb. Bundan əvvəl dövlət ittihamçısı onun 7 il müddətinə azadlıqdan məhrum edilməsini istəmişdi.
"İşçi Masası" Həmkarlar İttifaqları Konfederasiyasının üzvü olan Möhyəddin Orucov ilk dəfə 2023-cü ilin oktyabrında polisə tabe olmamaq ittihamı ilə inzibati qaydada 30 sutka həbs edilib. Həbsdən çıxdıqdan qısa müddət sonra polisdə zorakılığa məruz qaldığını bildirib. Elə həmin il dekabrın 13-də yenidən saxlanılıb və ona qarşı Cinayət Məcəlləsinin 234.4.3-cü maddəsi ilə (narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma külli miqdarda törədildikdə) ittiham irəli sürülüb.
Yerli hüquq müdafiəçiləri, Möhyəddin Orucov və yaxınları həbsin fəalın fəaliyyətilə bağlı olduğunu bildirirlər.