Vilayəti: İraqdakı seçkilər düşmənlərin sui-qəsdlərini məyus etdi

İslam İnqilabının Liderinin Beynəlxalq Əlaqələr üzrə müşaviri Əli Əkbər Vilayəti: "İraqdakı seçkilər düşmənlərin sui-qəsdlərini puç etdi" deyib.

İslam İnqilabının Liderinin Beynəlxalq Əlaqələr üzrə müşaviri Əli Əkbər Vilayəti Tehranda İraq Milli Hikmət Hərəkatının sədr müavini Seyid Möhsün Həkim ilə görüşüb.

Görüş zamanı Vilayəti İran-İraq münasibətlərinin "möhkəm" olduğunu bildirərək deyib: "İki ölkə arasındakı münasibətlər hər gün daha da güclənir. Bu, İslam dünyası üçün ümid mənbəyi olacaq".

Vilayəti 11 noyabrda keçirilən parlament seçkilərində iraqlıların iştirakını "böyük uğur" və ölkənin "siyasi yetkinliyinin" əlaməti kimi xarakterizə edərək əlavə etdi: "İraqdakı seçkilər düşmənlərin sui-qəsdlərini puç etdi".

Komissiyanın məlumatına görə, İraqda altıncı dəfə keçirilən parlament seçkilərində seçici fəallığı xüsusi səsvermədə 82,42%, ümumi səsvermədə isə 54,35% təşkil edib.

Ötən həftə keçirilən parlament seçkilərində şiə siyasi partiyaları parlamentdəki 329 yerdən 175-dən çoxunu qazanıblar.