Aprelin 4-də Londonun ICE birjasının ticarət məlumatlarına əsasən, "Brent" markalı neftin qiyməti 7.4 faiz düşərək bir barel üçün 64.74 dollar olub. Sonuncu dəfə "qara qızıl" 65 dollardan aşağı 2021-ci ilin avqustunda satılmışdı.
ABŞ prezidenti Donald Trampın bütün ölkələrdən idxal olunan məhsullara yeni tariflər tətbiq etməsindən sonra neftin qiyməti düşüb. ABŞ dünyanın müxtəlif ölkələri üçün 10-dan 50 faizə qədər tariflər tətbiq etmək qərarına gəlib. Bunun neftə tələbi azalda biləcəyi ilə bağlı qorxular artırıb. Üstəlik, OPEC+ ölkələrinin neft hasilatını artırmaq qərarının da bazara mənfi təsir göstərdiyi bildirilir.
"Yarım ildə neftin qiyməti 70 dollardan aşağı düşsə və ilin sonuna kimi 70-dən aşağı qalsa, o zaman Azərbaycanda ümumi makroiqtisadi göstəricilərə çox ciddi mənfi təsirləri ola bilər". İqtisadçı Natiq Cəfərli AzadlıqRadiosuna deyib ki, hələlik, ilin əvvəlindən götürülsə, Azərbaycan neftinin ortalama qiyməti 75 dollardan da yüksəkdir. Yanvar, fevral, mart aylarında neftin qiymətləri daha yüksək olub: "Yəni, bunun günlük yox, rüblük, yarım illik və illik hesablanması daha doğru olar. Əgər tendensiya belə davam etsə və orta qiymət 70 dollardan aşağı düşsə, icmal büdcənin yerinə yetirilməsində müəyyən problemlər yaşana bilər. İndi, hələlik, təhlükəli hədd deyil".
Əgər tendensiya belə davam etsə və neftin orta qiyməti 70 dollardan aşağı düşsə