Rusiya və Səudiyyə Ərəbistanı “OPEC+” çərçivəsində fəaliyyətləri əlaqələndirəcəklər

Rusiya və Səudiyyə Ərəbistanı “OPEC+” (OPEC və təşkilata daxil olmayan ölkələri əhatə edən neft istehsalının azaltması üzrə təşəbbüs) çərçivəsində fəaliyyətlərin koordinasiyasını davam etdirməyə hazır olduqlarını təsdiqləyiblər.

Operativtv.com APA-ya istinadən verdiyi məlumata görə, bunu Rusiyanın xarici işlər naziri Sergey Lavrov Səudiyyə Ərəbistanının xarici işlər naziri Feysəl bin Fərhan Al Səud ilə danışıqların yekunlarına dair mətbuat konfransında deyib.

"Biz “OPEC+” çərçivəsində fəaliyyətlərin gələcək əlaqələndirilməsinə qarşılıqlı hazır olduğumuzu bir daha təsdiqlədik, bu formatda iştirak edən bütün ölkələr qlobal enerji daşıyıcıları bazarında lazımi tarazlığın və sabitliyin təmin edilməsi üçün öz öhdəliklərini ardıcıl şəkildə yerinə yetirirlər", - Sergey Lavrov qeyd edib.

Xarici işlər naziri həmçinin qeyd edib ki, danışıqlar çərçivəsində tərəflər gələcəkdə ticarətin artırılması üçün əlavə addımlar atmaq barədə razılığa gəliblər.