Azərbaycana 10 santimetrədək qar yağıb - Foto

Dekabrın 27-si gecə saatlarından Azərbaycanın şimal rayonlarına qar yağmağa başlayıb.

AzərTACa-ın məlumatına görə, dağlıq ərazilərdə temperatur mənfi 8 dərəcəyədək aşağı düşüb.

Quba, Qusar və Xızı rayonlarının dağlıq ərazilərində qarın hündürlüyü 10 santimetrə çatır. Ən çox yağıntı Qubanın Qırız, Xınalıq kəndlərində və Xızının Altıağac qəsəbəsində qeydə alınıb.

Qusarın rayon mərkəzində qarın hündürlüyü 7 santimetrə çatır.

Hazırda qar Quba, Qusar və Xızı rayonları ərazisinə yağmaqda davam edir.

Dekabrın 28-də günorta saatlarından başlayaraq Naxçıvan şəhərinə də ilk qar yağıb.

Qar yağması muxtar respublikanın rayonlarında da müşahidə edilib. Şahbuz və Ordubad rayonlarının dağ kəndlərinə axşam saatlarından yağan qar daha intensiv olub.

Hazırda muxtar respublikanın ərazisində soyuq və yağıntılı hava şəraiti hökm sürür.

Qeyd edək ki, ötən il muxtar respublikanın ərazisinə ilk qar dekabrın 7-də, 2016-cı ildə isə oktyabrın 26-da yağıb.