"ToplumTV" ilə bağlı cinayət işi üzrə bir ildən çoxdur həbsdə saxlanılan jurnalistlərin məhkəməsi başlanıb. "ToplumTV"nin təsisçisi, media hüququ eksperti Ələsgər Məmmədli deyir ki, həbsdə olduğu müddətdə sağlıq durumu ağırlaşıb, təcili əməliyyata ehtiyacı var. Məhkəmə isinin uzun çəkməsi onun həyatını təhlükə altında qoyur. Elə bu üzdən, aprelin 2-də Bakı Ağır Cinayətlər Məhkəməsində "ToplumTV" işi üzrə başlayacaq prosesin ilkin hazırlıq iclasında Ə.Məmmədlinin vəkili Fəxrəddin Mehdiyev onun ev dustaqlığına buraxılması haqda vəsatət verib. Vəkil deyir ki, müvəkkili, eləcə də digər "toplum"çular heç bir cinayət törətməsələr də, 1 il 1 aydır nahaq yerə həbsdə saxlanılırlar.
Ə.Məmmədlinin sağlamlığındakı problemlərin həbsdə daha da kəskinləşdiyini vurğulayan müdafiəçi deyir ki, onun ev dustaqlığına buraxılması məsələsinə təcili baxmaq gərəkir. Axı hər keçən gün onun əleyhinədir: "Onu bu vəziyyətdə həbsdə saxlamaq işgəncədir, qeyri-insani davranışdır".
"Biz də adekvat reaksiya verəcəyik"
Təqsirləndirilən şəxslərdən III Respublika Platformasının qurucularından biri və sədri Akif Qurbanov onların siyasi sifarişlə həbs olunduğunu hər kəsin bildiyini vurğulayıb: "Cinayət işinin materiallarında məni banda başçısı kimi təqdim ediblər. Əgər başçı mənəmsə, yaxşı, onda məni saxlayın, heç olmasa, bu adamları buraxın. Bu adamları niyə boş yerə həbsdə saxlayırsınız? Bu məhkəmənin formal olduğunu yaxşı bilirəm. Onu da deyim ki, əgər burada bizə qarşı hansısa pozuntu olsa, biz də adekvat reaksiya verəcəyik".
Digər vəkillər də müvəkkillərinin ev dustaqlığına buraxılması barədə vəsatətlər qaldırıblar.
Məhkəmənin hazırlıq iclasında məlum olub ki, vəkil Fuad Ağayev A.Qurbanovun müdafiəsinə qoşulub. O, məhkəməyə məktub göndərərək iki həftə vaxt istəyib. Bunu da belə əsaslandırıb ki, cinayət işinin materialları ilə tanış deyil, ona vaxt lazımdır. Bu üzdən, hazırlıq iclasının aprelin 24-dək ertələnməsinə qərar verilib.
Məhkəmə prosesinə sədrlik edən hakim Azər Tağıyev təqsirləndirilən şəxslərin ev dustaqlığına buraxılması məsələsinin növbəti iclasda müzakirəyə çıxarılıb qərar veriləcəyini bildirib.
Xatırlatma
"ToplumTV işi" üzrə həbslər ötən ilin martından başlanıb. O vaxt bu işlə bağlı III Respublika Platformasının spikeri Akif Qurbanov, qurumun üzvü Ruslan İzzətli, Demokratik Təşəbbüslər İnstitutunun üzvləri Ramil Babayev, İlkin Əmrahov, Əli Zeynal, eləcə də "ToplumTV"nin təsisçisi Ələsgər Məmmədli və redaktoru Müşfiq Cabbar həbs ediliblər. Daha iki nəfər – Fərid İsmayılov və Elmir Abbasov haqqında həbslə bağlı olmayan qətimkan tədbiri seçilsə də, F.İsmayılov 2025-ci ilin yanvarında həbs olunub.
Fevralda həmin işlə bağlı jurnalist Şahnaz Bəylərqızı da həbs edilib, ancaq elə həmin ayın sonunda ev dustaqlığına buraxılıb.
"ToplumTV işi" üzrə təqsirləndirilənlərə qaçaqmalçılıq, cinayət yolu ilə əldə edilmiş külli miqdarda əmlakı leqallaşdırma, qanunsuz sahibkarlıq, vergidən yayınma, əmək müqaviləsi olmadan işçiləri cəlb etmə və başqa ittihamlar verilib. Onlara ittiham verilən maddələrdə 12 ilədək həbs cəzası nəzərdə tutulub. Təqsirləndirilənlərin heç biri ittihamları qəbul etmir.
Bütövlükdə 2023-cü ilin noyabrından bəri Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs olunub. Onların heç biri özünü təqsirli bilmir, peşə fəaliyyətlərinə görə siyasi sifarişlə cəzalandırıldıqlarını deyirlər.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təxminən 350 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslarla həbs edilmir. Onların dediyinə görə, həmin siyahılarda yer alanlar yalnız törətdikləri əmələ görə məsuliyyətə cəlb ediliblər.
AzadlıqRadiosu
Akif Qurbanov: 'Bandanın başçısı mənəmsə, bu adamları niyə boş yerə həbsdə saxlayırsınız?'
"ToplumTV" ilə bağlı cinayət işi üzrə bir ildən çoxdur həbsdə saxlanılan jurnalistlərin məhkəməsi başlanıb. "ToplumTV"nin təsisçisi, media hüququ eksperti Ələsgər Məmmədli deyir ki, həbsdə olduğu müddətdə sağlıq durumu ağırlaşıb, təcili əməliyyata ehtiyacı var. Məhkəmə isinin uzun çəkməsi onun həyatını təhlükə altında qoyur. Elə bu üzdən, aprelin 2-də Bakı Ağır Cinayətlər Məhkəməsində "ToplumTV" işi üzrə başlayacaq prosesin ilkin hazırlıq iclasında Ə.Məmmədlinin vəkili Fəxrəddin Mehdiyev onun ev dustaqlığına buraxılması haqda vəsatət verib. Vəkil deyir ki, müvəkkili, eləcə də digər "toplum"çular heç bir cinayət törətməsələr də, 1 il 1 aydır nahaq yerə həbsdə saxlanılırlar.
Ə.Məmmədlinin sağlamlığındakı problemlərin həbsdə daha da kəskinləşdiyini vurğulayan müdafiəçi deyir ki, onun ev dustaqlığına buraxılması məsələsinə təcili baxmaq gərəkir. Axı hər keçən gün onun əleyhinədir: "Onu bu vəziyyətdə həbsdə saxlamaq işgəncədir, qeyri-insani davranışdır".
"Biz də adekvat reaksiya verəcəyik"
Təqsirləndirilən şəxslərdən III Respublika Platformasının qurucularından biri və sədri Akif Qurbanov onların siyasi sifarişlə həbs olunduğunu hər kəsin bildiyini vurğulayıb: "Cinayət işinin materiallarında məni banda başçısı kimi təqdim ediblər. Əgər başçı mənəmsə, yaxşı, onda məni saxlayın, heç olmasa, bu adamları buraxın. Bu adamları niyə boş yerə həbsdə saxlayırsınız? Bu məhkəmənin formal olduğunu yaxşı bilirəm. Onu da deyim ki, əgər burada bizə qarşı hansısa pozuntu olsa, biz də adekvat reaksiya verəcəyik".
Digər vəkillər də müvəkkillərinin ev dustaqlığına buraxılması barədə vəsatətlər qaldırıblar.
Məhkəmənin hazırlıq iclasında məlum olub ki, vəkil Fuad Ağayev A.Qurbanovun müdafiəsinə qoşulub. O, məhkəməyə məktub göndərərək iki həftə vaxt istəyib. Bunu da belə əsaslandırıb ki, cinayət işinin materialları ilə tanış deyil, ona vaxt lazımdır. Bu üzdən, hazırlıq iclasının aprelin 24-dək ertələnməsinə qərar verilib.
Məhkəmə prosesinə sədrlik edən hakim Azər Tağıyev təqsirləndirilən şəxslərin ev dustaqlığına buraxılması məsələsinin növbəti iclasda müzakirəyə çıxarılıb qərar veriləcəyini bildirib.
Xatırlatma
"ToplumTV işi" üzrə həbslər ötən ilin martından başlanıb. O vaxt bu işlə bağlı III Respublika Platformasının spikeri Akif Qurbanov, qurumun üzvü Ruslan İzzətli, Demokratik Təşəbbüslər İnstitutunun üzvləri Ramil Babayev, İlkin Əmrahov, Əli Zeynal, eləcə də "ToplumTV"nin təsisçisi Ələsgər Məmmədli və redaktoru Müşfiq Cabbar həbs ediliblər. Daha iki nəfər – Fərid İsmayılov və Elmir Abbasov haqqında həbslə bağlı olmayan qətimkan tədbiri seçilsə də, F.İsmayılov 2025-ci ilin yanvarında həbs olunub.
Fevralda həmin işlə bağlı jurnalist Şahnaz Bəylərqızı da həbs edilib, ancaq elə həmin ayın sonunda ev dustaqlığına buraxılıb.
"ToplumTV işi" üzrə təqsirləndirilənlərə qaçaqmalçılıq, cinayət yolu ilə əldə edilmiş külli miqdarda əmlakı leqallaşdırma, qanunsuz sahibkarlıq, vergidən yayınma, əmək müqaviləsi olmadan işçiləri cəlb etmə və başqa ittihamlar verilib. Onlara ittiham verilən maddələrdə 12 ilədək həbs cəzası nəzərdə tutulub. Təqsirləndirilənlərin heç biri ittihamları qəbul etmir.
Bütövlükdə 2023-cü ilin noyabrından bəri Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs olunub. Onların heç biri özünü təqsirli bilmir, peşə fəaliyyətlərinə görə siyasi sifarişlə cəzalandırıldıqlarını deyirlər.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təxminən 350 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslarla həbs edilmir. Onların dediyinə görə, həmin siyahılarda yer alanlar yalnız törətdikləri əmələ görə məsuliyyətə cəlb ediliblər.
AzadlıqRadiosu