İsveçli jurnalist Yoakim Medin Türkiyədə "silahlı terror təşkilatına üzvlük" və "prezidenti təhqir etmək" ittihamları ilə həbs edilib.
“Dagens ETC” qəzetinin baş redaktoru Andreas Qustavsson bildirib ki, İstanbul Böyükşəhər Bələdiyyəsinin sədri Əkrəm İmamoğlunun həbsinə etiraz olaraq keçirilən aksiyaları işıqlandırmaq üçün Türkiyədə olan Medindən iki gün xəbər almaq mümkün olmayıb.
"Jurnalistlərin bu şəkildə hədəfə alınması, təəssüf ki, Türkiyədə yeni bir şey deyil. Lakin son illərdə hökumətin taktikasında dəyişiklik baş verib və jurnalistlər qanunvericilik və internet senzurası vasitəsilə susdurulur" - "Sərhədsiz Reportyorlar" təşkilatının İsveç bölməsinin rəhbəri Erik Larsson Medinin həbsi ilə bağlı açıqlamasında bildirib.
Medinin həbsi Türkiyədə mətbuat azadlığı ilə bağlı müzakirələrin daha da qızışdığı bir vaxta təsadüf edir.
Martın 26-da Türkiyədəki aksiyalardan reportaj hazırlayarkən saxlanılan Böyük Britaniyanın “BBC” kanalının müxbiri Mark Louen də martın 27-də deportasiya edilib.
“BBC” məlumatı təsdiqləyib.
Türkiyənin daxili işlər naziri Ali Yerlikaya daha əvvəl bildirmişdi ki, İstanbul Bələdiyyə sədri Əkrəm İmamoğlunun saxlanıldığı martın 19-dan bəri 1418 nəfər həbs edilib.
Saxlanılanlar arasında çox sayda jurnalist də olub.
Həftənin əvvəlində həbs edilən yeddi jurnalist cümə axşamı sərbəst buraxılsa da, onlara qarşı ittihamlar hələ də qüvvədədir.
AbzasMedia
İsveçli jurnalist Türkiyədə terror və prezidenti təhqir etmək ittihamları ilə həbs edilib