İsrail qüvvələri Cenin qaçqın düşərgəsinə hücum edib

İsrail 2002-ci ildən bəri ilk dəfə tanklarla işğal altındakı İordan çayının qərb sahilinə daxil olaraq ərazinin şimalındakı Cenin qaçqın düşərgəsinə basqın edib.

İsrail əsgərləri 3 tank və digər hərbi maşınlarla Cenin qaçqın düşərgəsinə daxil olub.

Fəallar tərəfindən paylaşılan və yerli mediada yayılan görüntülərdə fələstinli uşaqların tanklara daş atması əks olunub.

Şahidlərdən alınan məlumata əsasən, İsrail əsgərləri iki buldozerlə Cenin şəhərinin qərbindəki Yamun qəsəbəsinə basqın ediblər.

İsrail ordusu buldozerlərlə şəhərin küçələrini qazmağa, infrastrukturu, su və elektrik xətlərini dağıtmağa başlayıb.

Fələstinin rəsmi agentliyi WAFA-da yayımlanan xəbərdə İsrail qüvvələrinin Yamun qəsəbəsinə basqın etdiyi və bir çox evə hücum çəkdiyi və bəzi fələstinlilərin nəzarətə alındığı bildirilib.

İsrail əsgərləri dünən səhər saatlarında Cenin şəhərinin cənubunda yerləşən Kabatiyə qəsəbəsinə basqın edərək, qəsəbədə 48 saatlıq komendant saatı tətbiq edəcəklərini açıqlayıblar.

Az.shafaqna.com