İsrailli BMT tribunasından danışdı: 7 oktyabr qisas müharibəsi üçün bəhanə idi

Valideynləri 2023-cü il oktyabrın 7-də Nativ ha-Asara moşavında qətlə yetirilən israilli Maoz İnon sentyabrın 29-da BMT Təhlükəsizlik Şurasında çıxış edərək İsrail hökumətinə kəskin hücum çəkib. Maoz İnonun sözlərinə görə, hökumət “HƏMAS-ın əməliyyatlarından istifadə edərək dağıdıcı qisas müharibəsi aparmaq üçün bir bəhanə kimi istifadə edib”.

İnon bəyan edib ki, “İsrail rəhbərliyinin əməlləri fəlakətli nəticələrə, Qəzzanın dağıdılmasına gətirib çıxarıb, etnik təmizləməni, məskunlaşmanın genişlənməsini və Yəhudiyyə ilə Samariyada məcburi köçürülməni sürətləndirib”.

Yaxın Şərqdəki vəziyyətin növbəti müzakirəsi zamanı İnon Təhlükəsizlik Şurasının üzvlərinə müraciət edərək deyib: “Mən Qəzza sərhədində böyümüşəm. Oktyabrın 7-si səhər mənim dünyam dağıldı. Sevimli valideynlərim Nativ ha-Asarada HƏMAS hücumunun ilk qurbanları arasında idilər. İki gün sonra, matəm içində olarkən, ailəmiz şüurlu şəkildə qisasdan imtina etmək qərarına gəldi. Qisas valideynlərimi heç vaxt geri qaytarmaz. O, yalnız bitməyən qan tökülməsi dövrəsini qidalandıracaq”.

İnon sözünə davam edib: “Bu qaranlıqda İsrail həbsxanasında işgəncələrdən sonra qardaşı Taysiri itirən Şərqi Qüdsdən olan fələstinli Əziz Əbu-Sara mənə müraciət etdi. Əziz mənim acımın nə qədər ağır olduğunu anladı. Biz kədər və ümidsizliyin ümidə çevrilə biləcəyini sübut etmək üçün birlikdə “İnterAct International” təşkilatını yaratdıq. Başqa bir gələcək qurmaq üçün reallığın üzünə baxmaq lazımdır. HƏMAS 7 oktyabrda təqsirsiz israilliləri öldürdü. Eyni zamanda İsrail hökuməti bu vəhşiliklərdən dağıdıcı qisas müharibəsi aparmaq üçün istifadə etdi”.

İnon “ağrını ədalətli və davamlı sülhə çevirmək üçün” beş bənddən ibarət plan təqdim edib. Bura “geniş sülh koalisiyası” və “iki xalq üçün iki dövlət” prinsipinin reallaşdırılması daxildir.

İnon qeyd edib: “Silah yükləməkdən imtina edən italyan liman işçilərindən tutmuş məskunlaşma məhsullarına qarşı çıxan həmkarlar ittifaqlarına qədər dünya hərəkatları bizə qoşulur. Biz beynəlxalq ictimaiyyəti bizə qoşulmağa çağırırıq. Oslo sazişləri sübut etdi ki, hətta amansız düşmənlər belə bir-birini tanımaq qərarına gələ bilərlər. Tarix bizə öyrədir ki, sülh imkansız olduğuna görə deyil, liderlərin ona nail olmaq üçün cəsarəti çatmadığına görə uğursuzluğa düçar olur”.

O, fikrini belə yekunlaşdırıb: “7 oktyabrda mən valideynlərimi, uşaqlıq dostlarımı və bütün ömrüm boyu tanıdığım bir çox insanı itirdim, lakin Əziz Əbu-Saranı qardaş kimi qazandım”.

İnondan sonra Təhlükəsizlik Şurasında Əziz Əbu-Sara çıxış edib. Onun sözlərinə görə, “işğal, məskunlaşma və Qəzzanın dağıdılması dözülməz bir ədalətsizlikdir”.

Əbu-Sara İnonu tanıdığı ən cəsur insanlardan biri adlandırıb. O xatırladıb ki, 7 oktyabrdan bir həftə sonra İnon televiziyada yalnız valideynləri üçün deyil, həm də Qəzzada həlak olan uşaqlar üçün kədərləndiyini bəyan etmişdi.

Əbu-Saranın fikrincə, regionda sülhə nail olmaq üçün Təhlükəsizlik Şurası zorakılığı dəstəkləyən şəxslərə və təşkilatlara qarşı ünvanlı sanksiyalar tətbiq etməlidir. O, beynəlxalq ictimaiyyətin artıq məskunlaşanlara və məskunlaşma yerlərinə qarşı məhdudiyyətlər elan etmiş Fransa, Böyük Britaniya, Kanada və digər ölkələrə qoşulmasından başlamağı təklif edib.

O, həmçinin İsrail həbsxanalarındakı fələstinlilərə kömək etmək üçün Qırmızı Xaç Komitəsini cəlb etməyə çağırıb. Onun bəyanatlarına görə, “İsrail 9000-dən çox fələstinlini, o cümlədən 370-dən çox uşağı saxlayır”.