Cümhuriyyət Xalq Partiyasının (CHP) sədri Özgür Özəl Türkiyə boyu etiraz aksiyalarına çağırış edib.
“Bütün Türkiyəni 81 vilayətdə, 973 rayonda axşam iftardan sonra, saat 20:30-dan etibarən keçirəcəyimiz böyük mitinqlərə, meydanlara və küçələrə dəvət edirəm”, - Bəylikdüzü Bələdiyyəsində çıxış edən Özəl bildirib.
“Əgər qarşımıza qanuna zidd əmrlə sədd çəkən, baryer quran varsa, polisə zərər vermədən onları aşın və keçin”, - deyə Özəl əlavə edib.
Türkiyə Prezidenti Rəcəb Tayyib Ərdoğan isə Özəlin açıqlamalarına “Türkiyə küçə terroruna təslim edilməyəcək” sözləri ilə reaksiya verib.
“Marjinalların arxasınca gedərək polisimizə hücum etməklə, vəzifəsini yerinə yetirən hakim və prokurorlarımızı təhdid etməklə, məhkəmələrə təzyiq göstərməklə, demokratiyaya və milli iradəyə meydan oxumaqla, qeyri-qanuni və antidemokratik yolları seçməklə heç bir nəticəyə varmaq olmaz” - Ərdoğan deyib.
Özəlin çağırışı Ankara və İzmir valiliklərinin martın 25-nə qədər etiraz aksiyalarını qadağan etdiklərini açıqlamasından sonra gəlib. Manisa Valiliyi də eyni tarixə qədər etirazlara qadağa qoyub.
İstanbulda isə martın 23-nə qədər toplaşma qadağası, bəzi metro stansiyalarının bağlanması kimi təhlükəsizlik tədbirləri qüvvədədir.
İstanbul və Ankara başda olmaqla, müxtəlif şəhərlərdə martın 20-də etiraz aksiyaları keçirilib.
Daxili İşlər Naziri Ali Yerlikaya 53 nəfərin “dövlət əmlakına zərər vurma” və “vəzifəli şəxsə müqavimət göstərmə” ittihamları ilə saxlanıldığını açıqlayıb. Yerlikaya 16 polis əməkdaşının xəsarət aldığını əlavə edib.
Qadağalara baxmayaraq, böyük şəhərlər başda olmaqla, Türkiyənin müxtəlif yerlərində etiraz aksiyalarının keçiriləcəyi elan edilib.
CHP İstanbul, Ankara və İzmir daxil olmaqla 14 böyük şəhər və 21 vilayətdə eyni anda mitinqlər keçirəcəyini açıqlayıb.
Saraçhanədəki mitinqə Xalqın Bərabərlik və Demokratiya Partiyası (DEM) və Türkiyə İşçi Partiyası (TİP) daxil olmaqla müxalifət partiyaları və həmkarlar ittifaqları da qatılacaqlarını bildiriblər.
İstanbul və Ankara başda olmaqla bir çox universitetdə tələbələr dərsləri boykot edərək İmamoğlunun saxlanılmasını etiraz etmək üçün küçələrə çıxacaqlarını elan ediblər.
AbzasMedia
Cümhuriyyət Xalq Partiyasının sədri Özgür Özəl Türkiyə boyu etiraz aksiyalarına çağırış edib