Azərbaycan və İran prezidentləri əməkdaşlığın inkişaf perspektivlərini müzakirə edib

Azərbaycan və İran Prezidentləri İlham Əliyev və Məsud Pezeşkian bir-birini ölkəsinə səfərə dəvət edib. Hər iki prezident dəvəti qəbul edib.

Bu barədə iyulun 9-da Azərbaycan və İran Prezidentlərinin telefon danışığı barədə Azərbaycan Prezidentinin Mətbuat xidmətinin yaydığı məlumatda deyilir.

Məlumatda bildirilir ki, İran Prezidenti gələcəkdə də iki ölkə arasında münasibətlərin bütün sahələrdə inkişaf etdirilməsi üçün səylərini əsirgəməyəcəyini deyib.

“Söhbət zamanı ortaq dini-mədəni köklər, dostluq və qardaşlığa əsaslanan Azərbaycan-İran əlaqələrinin bundan sonra da genişlənəcəyinə və müxtəlif sahələri əhatə edən əməkdaşlığımızın inkişaf edəcəyinə əminlik ifadə olunub.

Dövlət başçıları ölkələr arasında indiyədək əldə edilmiş razılaşmaların həyata keçirilməsinin əhəmiyyətini vurğulayıblar,” mətbuat xidmətinin məlumaında qeyd edilir.

Telefon söhbəti əsnasında Azərbaycan və İran prezidentləri qarşılıqlı maraq doğuran məsələləri müzakirə ediblər.

Azərbaycan Prezidenti İlham Əliyev iyulun 6-da İranın yeni seçilmiş prezidenti Məsud Pezeşkiana təbrik məktubu göndərib.