İran ABŞ-ın Yəmənə raket yanacağı göndərməklə bağlı iddiasına münasibət bildirib

 Tehran ABŞ-ın İranın Yəmənə 70 ton raket yanacağı göndərdiyini iddia edən bəyanatlarına cavab verib.

Operativtv.com SalamNews-a istinadən xəbər verir ki, bu barədə İranın BMT-dəki Nümayəndəliyi təkzib bəyanatı verib.

“İran BMT Təhlükəsizlik Şurasının Yəmənə silah embarqosu ilə bağlı 2216 saylı qətnaməsinə əməl edir”, deyə İranın BMT-dəki Nümayəndəliyi ABŞ mediasında tirajlanan sözügedən xəbərə münasibət bildirib.

“Tehran bu qətnamə çərçivəsində yaradılmış sanksiyalar komitəsi ilə fəal əməkdaşlıq edir və indiyədək qətnamənin pozulması ilə bağlı heç bir iddia sübuta yetirilməyib”, deyə İran Nümayəndəliyi vurğulayıb.

ABŞ KİV-lərinin məlumatına görə, “ordu Oman dənizində İrandan Yəmənə partlayıcı maddələr daşıyan qayığı ələ keçirib.”