“... Anam həbs olunan xanımlarla əlaqəsi olmadığı kimi hadisə baş verən gün onlarla birlikdə də deyildi.” Həbs olunan inanclı xanım Xoşqədəm Quliyevanın qızı anasının həbsi ilə bağlı paylaşım edib. O, avqustun 15-də anasının həbsini qanunsuz və şərlənmə olduğunu bildirib.
“Hadisə baş verən gün, avqustun 15-də anam işdə olub. O, Zirə qəsəbəsində işləyir və təxminən 20:15 radələrində işdən evinə gələrək polis tərəfindən saxlanılıb. Bir neçə şəxs anamı maşına zorla salaraq hicabını da açıblar. Ardınca evimizdə axtarış aparılıb və heç bir sübut tapmadıqları üçün özləri ilə gətirdikləri qanunsuz əşyaları otağa qoyaraq anamın adına sənədləşdiriblər.”
X. Quliyevanın qızı bildirib ki, anasının o xanımlarla heç bir əlaqəsi olmadığı kimi hadisə günü də anası orada olmayıb. Bunu sübut edən orada lentə alınan video görüntülər də göstərir. Lakin qəsdən həbs olunması göstəriş olan Xöşqədəm xanım hadisədən bir neçə saat sonra saxlanılıb.
“Avqustun 27-də anam Xəzər Rayon Məhkəməsində hakim önünə çıxarılıb. Orada da anam bildirib ki o, ehsan paylanılan zaman iş yerində olub deyə məlum hadisə ilə heç bir əlaqəsi yoxdur.
Anam qanunsuz şərlənərək həbs edilməsinə etiraz olaraq saxlanıldığı gündən aclıq aksiyasını davam etdirir. Onkoloji xəstənin aclıq aksiyası keçirməsi onu ölüm riski ilə qarşı-qarşıya qoyur.
Əlaqədar orqanlardan yazıb xahiş edirəm anamın işinə yenidən baxılsın. O, günahsızdır və hal-hazırda həyati mübarizə aparır.”
Xatırladaq ki, avqustun 15-də Xəzər rayonu Binə qəsəbəsində bir qrup qadın İmam Hüseynin (ə) 40-ı, Ərbəin günündə ehsan paylamağa çalışıblar və rayon polis idarəsi tərəfindən saxlanılıblar. Sonradan hadisə zamanı tamam başqa bir ünvanda olan Xoşqədəm Quliyeva da saxlanılaraq sayı altı nəfərə yüksələn inanclı xanımlara cinayət işi başlanılıb.
Onkoloji xəstə günahsız həbsinə etiraz olaraq aclıq aksiyasını davam etdirir